قبل ما تدخل جغرافيا !! اعرف قسم الجغرافيا

المقال دا مهم جدا لكل طالب في الثانوية العامة ، او كل طالب مقبل على التنسيق ، لكل ولي أمر بيختار ويحدد مصير ابنه او بنته ومحتاج يعرف هل ابنه يدخل جغرافيا ولا لأ ؟؟

في المقال دا هنوضح الصورة كاملة عن قسم الجغرافيا بكليات الآداب ، وهل القسم عملي فعلا وبيحتاج مجهود كبير ؟ ولا القسم نظري وبس بيعتمد على الحفظ ؟ 

قسم الجغرافيا ... من أعرق الأقسام في في كليات الآداب على الإطلاق ، في بعض الكليات والجامعات يرجع تاريخ قسم الجغرافيا إلى تاريخ انشاء الجامعة ..

قسم الجغرافيا موجود تقريبا في كل كليات الآداب بالجامعات المصرية .. سواء باقليم القاعرة الكبرى او الاقاليم الأخرى والمحافظات ، ويقبل كل قسم من اقسام الجغرافيا عدد معين من الطلاب وبدرجات مختلفة او حسب التنسيق .. تنسيق القبول بالكليات والمعاهد ....

نظام الدراسة في قسم الجغرافيا : 

الدراسة في قسم الجغرافيا بتكون اربعة سنوات ، مثل اغلب الكليات بالجامعات وبعدها يحصل الطالب على شهادة الليسانس في الجغرافيا .. خلال الأربع سنوات الطالب بيدرس مواد ومقررات في مختلف تخصصات علم الجغرافيا .

اقرأ ايضا : نظام التشعيب في قسم الجغرافيا

نظام مقررات الجغرافيا: 

الطالب في قسم الجغرافيا بيدرس مواد مختلفة منها ما هو يتعلق بالجغرافيا الطبيعية مثل جغرافية المناخ وجغرافية التربة والبنية والتضاريس، ومنها ما هو في الجغرافيا البشرية مثل جغرافية السكان وجغرافية العمران وكمان مقررات في الجغرافيا الاقتثادية مثل النقل والتجارة والصناعة والزراعة والسياحة ، قسم بيضم تخصصات كتير جدا في مجالات مترابطة وحيوية جدا جدا ، ومتنساش المساحة والخرائط ونظم المعلومات الجغرافية .

علاقة الجغرافيا بالمساحة : 

كتير من الطلاب بيسئلوا هي جغرافيا فيها مساحة ؟؟ طبعا جغرافيا فيها مساحة وخرائط.. اغلب اقسام الجغرافيا بالجامعات المصرية فيها نظام التشعيب .. ودا باختصار انك هتكون طالب عادي في الفرقة الاولى والفرقة الثانية وتقدر في الفرقة الثالثة تدخل شعبة المساحة والخرائط ، ودا بيكون بمجموعة شروط الطالب يقدر يحققها بسهولة جدا ، كمان فيه بعض الاقسام بيكون فيها شعبة تانية وهي نظم المعلومات الجغرافية !! ايوه هو ال GISودا بقا تخصص مهم جدا ومطلوب جدا في مجالات العمل المختلفة وللولاد والبنات كمان .

الدراسة في جغرافيا صعبة !

الدراسة في قسم الجغرافيا بتجمع بين الدراسة النظرية والدراسة العملية التطبيقية .. بمعنى : انت هتدرس مواد اصولية ومهمة جدا في التخصص ولا غنى عنها والمواد دي هتكون بمثابة حجر الاساس في دراستك وكمان شغلك ، المواد دي بتكون نظرية وفيه مواد تانية الدراسة بتكون فيها عملية او نقول كدا تطبيقية زي المساحة والخرائط ونظم المعلومات والاستشعار ... مواد ممتعة جدا لو انت حبيتها وفهمتها وحابب انها تكون بعد كدا مجال شغلك .

كمان الجغرافيا بتعتمد في مواد على الدراسات الميدانية ، والزيارات والرحلات   لان كتير من مواد الجغرافيا بتتدرس على ارض الواقع ..

ممكن اشتغل ايه بالجغرافيا ؟

دراستك في اي مجال من المجالات او اي تخصص بيعتمد في المقام الاول على تنمية قدراتك في المجال دا .. ولو اتكلمنا عن الجغرافيا انت هتكون محدد من البداية انت عاوز تكون ايه وتقف لحد فين .. الجغرافيا بتأهل لمجال التدريس في الدراسات الاجتماعية وبامتياز ، كمان تقدر تكون اخصائي مساحة وتشتغل في كتير جدا من الشركات الخاصة بهذا المجال، تقدر تشتغل في رسم الخرائط ودا على درجة كبيرة من الأهمية في سوق العمل، تقدر تشتغل في نظم المعلومات الجغرافية ..

المهم : انك متعتمدش في اي مجال او كلية على اللي انت بتدرسة وبس انت لازم تطور وتنمي من نفسك وتدور دايما على كل جديد في مجال تخصصك .