ليه معظم التماثيل المصرية القديمة بدون أنف؟ هل تعلم؟

مسألتش نفسك ليه معظم التماثيل المصرية القديمة بدون انف ؟

في نظريتين للموضوع لا ثالث لهم: اولهم هي النظرية المنطقية والشائعة وهي ان أنوف التماثيل تم كسهرها بالخطأ اثناء النقل او نتيجة عوامل الزمن بس النظرية دي مش دقيقة اوي لإن في علماء كثير سواء مصريين او اجانب قالوا حاجة منطقية وهي ان في اجزاء اكثر حساسية وعرضة للاحتكاك اثناء النقل زي مثلا الثعبان اللي بيكون مثبت في الرأس كتاج للملوك ( بص عالصورة تحت) بالإضافة ان في تماثيل مصنوعة من " الديوريت الأخضر" او من احجار " –Schist " الشيست ودي احجار شديدة الصلابة وهتلاقي  انفها مكسور برضه..

 

وده بيودينا للنظرية الثانية وهي الأقرب للمنطق :

زي ما انت عارف ان قدماء المصريين كانوا بيعتقدوا في البعث بعد الموت وده اللي خلاهم مهتمين الإهتمام الشديد ده بالتحنيط ومهتمين يدفنوا موتاهم في مناطق ذات طبيعة صحراوية بعيدا عن الرطوبة،  ووضع كل ما يلزم الميت معه داخل المقبرة علشان لما تعود ليه الحياة يكون جاهز..

 فاللي كان بيحصل هو ان سارقوا القبور وقتها كانوا عارفين الموضوع ده ومؤمنين بيه، ونظرًا لصعوبة الوصول للمومياء نفسها لوجودها داخل توابيت ولفها بالكتان ، ده كان بيخليهم يكسروا انوف التماثيل باعتباره رمز للشخص صاحب المقبرة اللي بيسرقوها،  اعتقادًا منهم إن الأنف هي سبيل التنفس ومن ثم هي سبيل الحياة فلما يكسروا الأنف فالميت لن يستطيع العودة للحياة مرة أخرى وبالتالي هيكونوا آمنين من انتقامه..

وفي علماء أثريين برضه ان التحطيم تم من اعداء الملك لكسر انفه،  لكن بيدحض النظرية دي ان الكثير من التماثيل هم لوزراء وكهنة وحتى لأناس عاديين ملهمش علاقة بالملوك!

اما بالنسبة لأنف ابو الهول فالوضع مِختلف:

 لحد وقت قريب كان في اعتقاد سائد ان نابليون بونبارت وجنوده في حملتهم على مصر قاموا بتدميره ،لكن كل الكلام ده تم نفيه لما وُجدت لوحة اترسمت سنة ١٧٣٧ لابي الهول من فنان دنماركي اسمه " فريدريك لويس"  وكان بدون انف يعني قبل الحملة الفرنسية ب ٦١ عام..

لكن اللي كسر أنف ابو الهول بحيب رواية المقريظي هو شخص من العصر الفاطمي اسمه " صائم الدهر" وقام بكسره لانه كان بيعتبره من الأوثان وهتلاقيني حاططلك اللوحة الدنماركية تحت..