U3F1ZWV6ZTIxMzgzNDc4MzQ4X0FjdGl2YXRpb24yNDIyNDUzMDg1MTg=

إيه هي الخطوات اللي اعملها عشان اتعلم GIS؟


إيه هي الخطوات اللي اعملها عشان اتعلم GIS؟
لازم أول ما ابدأ في المجال للgis اسأل نفسي ايه الي مفروض اعمله عشان اقدر اوصل لهدفي 😎✋

اول حاجه بعملها لما حد يكلمني يحجز معايا  بسأله طب انت ايه مستواك في GIS؟ 
في ناس تقولي فتحت البرنامج صطبت و كتير بيكون الرد انا وصلت للمستوى التاني (مثلاً)، فأول حاجة احب اوضحها ان الـGIS ملوش مستويات، زيه زي أي علم تاني، اما تقسيمة المستويات دي بتكون من المحاضرين عشان يقدروا يقسموا المحتوى لمراحل و التقسيمة بتختلف من محاضر للتاني، فالتقسيمات دي مش حاجة موحدة و متفق عليها يعني

اول حاجه لازم تعرفها : مبادئ و مفاهيم الـGIS
و هي الخطوة الأهم انك تعرف يعني ايه GIS و مش المعنى الحرفي او التعريفات الصماء الاكاديمية، لا تعرف الصورة العامة و بتدرسه ليه و ايه فايدته و ليه موجود من اساس، جاوبت على الاسئلة دي؟ ادخل على الخطوة التانية

تاني نقطه ودي مهمه جدا جدا  : ابدأ اتعرف على واجهة البرنامج اللي هتستخدمه عشان تتعامل معاه عشان تطبق مفاهيم الـGIS اللي فهمتها و اللي غالبا الناس بتميل انها تستخدم ESRI ArcGIS Desktop 

النقطه التالته ودي لو اتعلمتها صح هترتاح في إلى جاي  : إخراج الخرايط
دلوقتي انت جالك خريطة و محتاج تظبطها و تضيف شوية رموز على شوية عناصر على شوية كتابات عشان توصل الرسالة المطلوب توصيلها من الخريطة دي، و هنا في مشكلة بيوقع فيها ناس كتير جداً، اخراج الخرايط مش هو الـGIS ده جزء صغير جدا جدا جدا جداااااااااا من قدرات برامج الـGIS لكنه مش GIS تماماً

النقطه الرابعه عشان لما تشتغل في مكان لازم تبقى عارف الجزئيه دي : ابدأ اعرف ازاي تعدل على خريطة جيالك سواء على الخريطة او في قواعد البيانات المربوطة بالخريطة و طبعاً عشان تعمل كده لازم تكون فاهم شوية مفاهيم نظرية زي الارجاع الجغرافي و نظم الاحداثيات الجغرافية و المسقطة

النقطه الخامسه : خلاص بتعرف تتعامل مع البيانات؟ دلوقتي انت جاهز تعملها معالجة و تحليل عشان تطلع منها معلومات، ابدأ بالادوات المتعارف عليها و المشهورة (مثلاُ الموجودين في قائمة Geoprocessing في ArcMap)

النقطه السادسه : اساس اي نظام معلومات هو قواعد البيانات، ابدأ اعرف اكتر عن قواعد البيانات و التعامل معاها و طرق ضبط الجودة بتاعتها و منع حدوث اخطاء في ادخال البيانات سواء على الخريطة او في قاعدة البيانات

النقطه السابعه : خد فكرة عن الـweb GIS زي  ArcGIS online و ArcGIS for server لأن المستقبل للـweb ودي ممكن نعمل اكونت على كورسيرا والي حابب يعرفها هنزل عنها تفاصيل في بوست لوحده

اللي فات ده انا بسميه General GIS  

أومال في ايه بعد كده؟

بعد كده كل واحد بيتعمق في الحتة اللي عايز يتخصص فيها بعد كده، سواء مبرمج GIS باختلاف انواعهم سواء محلل GIS او cartographer او اخصائي قواعد بيانات او اخصائي GIS server

طب نذاكر منين؟ الإجابة الأبسط دائماً "جوجل صديق الانسان"، انت معاك الخطة و ناقصلك بس تدور على المصدر اللي هتسمع او تقرا منه، و عشان تبقى متميز في مجالك اياً كان لازم تعمل كده و عشان كده في اي كورس بديه في اي حته لازم يكون في جزء من الواجب ان الناس تاخد حاجة تعمل عليها search و يرجعولي نتناقش في اللي وصلوله

التطوير الذاتي مهارة مطلوبة في كل الشركات، ده غير انها هتوفرلك كتير جدا و بديل محترم للكورسات، و محدش يقول باخد كورس عشان الشهادة لأن مفيش شركة محترمة بتبص على شهادة كورس، الشركة بتمتحنك و بتشوف مدى فهمك لأن صاحب الشغل عايز يكسب، مش هيستفاد حاجة هو بالشهادات من غير مهارات
المنشور عجبك اترك تعليق وشير  عشان غيرك يستفيد 🙋‍♀️😉


الاسمبريد إلكترونيرسالة