العالم المصري محمد ثروت حسن - أحمد زويل الجديد

 العالم المصري محمد ثروت حسن - أحمد زويل الجديد


واضح ان مصر على موعد مع أحمد زويل جديد وهو العالم المصري محمد ثروت حسن.. اللي شكله هياخد نوبل السنة الجاية بإذن الله  بعد الاكتشاف اللي اكتشفه.



فزي ما حصل قبل أكتر من 30 سنة لما اتمكن العالم المصري الراحل أحمد زويل، من رصد حركة الذرات والجزيئات في زمن الفيمتو ثانية وهو إنجاز كبير احتفى بيه العالم وحصد عنه جائزة نوبل فبعد مرور كل الفترة دي ومن أيام قليلة بس قدر العالم المصري محمد ثروت حسن، من رصد حركة الإلكترونات في زمن الأتو ثانية الأسرع ألف مرة من الفيمتو ثانية!


مش كدة وبس ده عالمنا المصري قدر كمان يستغل اكتشافه ده في أنه يستخدمه  في تحويل المواد العازلة زي الزجاج لمواد موصلة للتيار الكهربائي!!


وده اللي  هيؤدي  لتطور ضخم هينتظره العالم في المستقبل وده مش كلامي ولا تحيز مني ده الكلام اللي أكدت عليه  مجلة "نيتشر فتونكس" العلمية الشهيرة اللي احتفت بإنجاز العالم المصري وفريقه.


محمد ثروت حسن اللي هو حالياً بيشغل منصب  أستاذ الفيزياء والضوء في جامعة أريزونا بالولايات المتحدة الأمريكية.. أتكلم عن إنجازه الضخم ده وقال :


 "أنا ومجموعتي البحثية بالتعاون مع باحثين من اليابان وألمانيا تمكنا من قياس الوقت اللازم للإلكترونات للتحرك داخل المواد العازلة تحت تأثير المجال الكهربي لنبضات الليزر، وذلك في زمن الأتو ثانية وهو مقياس من الزمن أسرع 1000 مرة من الفيمتو الثانية وهو زمن حركة الذرات والجزئيات التى تم رصدها منذ حوالي ثلاثة عقود ونصف بواسطة العالم أحمد زويل."


وكمل وقال ان أنه  قدر هو ومجموعته البحثية  يطوروا  تكنولوجيا التحكم في المجال الكهربي بنبضات ليزر الأتو ثانية ودي اللي  مكنته من التحكم في حركة الإلكترونات جوة  المواد العازلة بالتالي  التحكم في خواص  المادة العازلة دي وتحويلها لمادة موصلة للتيار.


طب وحاجة زي دي مهمة في إيه ؟


قالك إن القدرة في التحكم في المادة هتفتح الطريق لتطوير الإلكترونات الضوئية واللي بتعتمد على التحكم في انتقال التيار الكهربي والتحويل من الحالة الموصلة (ON) لغير الموصلة(OFF) بسرعة الأتو ثانية.


أيوة برضو ودي حاجة هتفيدنا في إيه برضو ؟


ركز في الإجابة كدة عشان صادمة ومذهلة جداً لو اتحققت. 


قالك إن الإلكترونات الضوئية دي هتبقي هي إلكترونيات المستقبل واللي هتزيد من سرعة الأجهزة الإلكترونية زي أجهزة الكمبيوتر وأجهزة الهواتف المحمولة 100 مليون مرة من السرعات الحالية!


متخيل الرقم والسرعة لو ده حصل فعلاً! 


مش كدة وبس ده قال كمان  أنه من التطبيقات المثيرة الخيالية التانية  للبحث بتاعه هي القدرة على نقل المعلومات باستخدام أشعة الليزر وبسرعة الضوء!


طبعاً  التقدم التكنولوجي في نقل المعلومات بالسرعة هو حلم العلماء من زمان واللي هيكون ليه تأثير مباشر على البشرية كلها! 


ده غير كمان إن تطوير الاتصال باستخدام ليزر الأتو ثانية هيخلي  الاتصال سريع جدا بين الأرض والمراكب الفضائية اللي على بعد مئات الألاف من الأميال. 


طب مين هو العالم المصري محمد  ثروت حسن ؟


هو من مواليد محافظة الفيوم اتخرج من جامعة القاهرة فرع الفيوم، بعدها  حصل على الدكتوراه من معهد ماكس بلانك في ألمانيا، وخلال أبحاث الدكتوراه اتمكن من توليد أول نبضات الليزر الأتوثانية الضوئي والموجود بموسوعة جينس العالمية كأقصي نبضات ليزر ضوئي، واستخدم حسن  الليزر ده لقياس حركة الإلكترونات جوة الذرة لأول مرة.


التحق حسن بعد كدة  بمعهد كاليفورنيا للتكنولوجيا "كالتك" كباحث ما بعد الدكتوراة مع مجموعة الدكتور أحمد زويل البحثية، واتمكن في  الفترة دي من توليد أقصر نبضات إلكترونية جوة الميكروسكوب رباعي الأبعاد، عشان ينضم بعد كدة لجامعة أريزونا كأستاذ الفيزياء وعلوم الضوء، وبيركز حاليا ومجموعته البحثية على التحكم وتصوير حركة الإلكترونات.

 حصل حسن قبل كدة  على جائزة منظمة كيك لتطويره كاميرا قادرة على تصوير الإلكترونات.


author-img
كوكب المنى

تعليقات

ليست هناك تعليقات
إرسال تعليق
    google-playkhamsatmostaqltradent