محطة معالجة الصرف الزراعي - بحر البقر

محطة معالجة الصرف الزراعي "بحر البقر" اللي افتتحها الرئيس انهاردة قدرت تقتنص 3 ألقاب في موسوعة غينيس للأرقام القياسية و تزيح المحطة المكسيكية عن لقب أكبر محطة معالجة الصرف الثلاثي في العالم 

1-المحطة الجديدة اتنفذت في 24 شهر بالظبط و اتكلفت 1.2 مليار دولار بتنتج سنويًا 2 مليار م٣ من المياه المعالجة 

2-المياه دي ايه مصدرها ؟ دي المياه اللي بيزرع بيها اهالي "شرق الدلتا" قرى محافظات الشرقية والقليوبية و الدقهلية والاسماعيلية ، بعد ما بيزرعوا بمياه النيل بيكون فيه مخلفات وصرف زراعي بيرموه في مصرف كبير اسمه مصرف بحر البقر اللي بيترمي فيه كمان صرف صناعي لبعض المصانع هناك و كمان صرف صحي لبعض القرى وبعدين مصرف بحر البقر بياخد في وشه كل الصرف ده ويرميه في بحيرة المنزلة 

3-بحيرة المنزلة كانت من اخصب البحيرات مش بس في مصر ده في العالم مساحتها كانت حوالي 750 الف فدان و بتنتج أجود انواع الأسماك على مدار عشرات السنين البحيرة بتستقبل صرف مصرف بحر البقر طبعا الحياة البحرية فيها اتدمرت من التلوث اللي بتستقبله يوميا 

4-البحيرة كانت بتطلع اسماك مريضة و مسمومة بتسبب امراض لا تعد ولا تحصى لمحافظات الدلتا اللي بياكلوا من السمك ده 

5-طيب ايه فايدة المحطة الجديدة ؟ اللي اعتبرها الرئيس حلم كان بيحلم يحققه ؟ المحطة هتاخد الصرف بتاع بحر البقر ده كله وبدل ما يترمي في بحيرة المنزلة هننقله الى سيناء بعد منعديه من تحت قناة السويس في سحارات مخصصة وبعدين هناك هتستقبله محطة معالجة هنعالج المياه دي بتكنولوجيا متقدمة جدًا اسمها معالجة ثلاثية وبالمناسبة دي تكنولوجيا مش موجودة غير في الدول المحترمة فقط اللي بتستفاد بكل نقطة مياة و بتحولها من مياه ملوثة الى مياه نقية ممكن تتزرع بيها 

6-المحطة بعد ما تعالج الصرف ده كله هتبدأ تنقل المياه المعالجة النظيفة دي الى ترع جديدة جوا سيناء عشان نزرع بيها 400 الف فدان 

7-هنحول 400 الف فدان صحراء الى اراضي زراعية منتجة خضروات وفاكهة وحبوب هنعمر سيناء و ننقل اليها الالاف السكان ونحافظ على صحتنا من التلوث وكل ده من مياه كانت ملوثة بتترمي في بحيرة خصبة بتدمرها و تدمر صحة ملايين المصريين 

8-طيب المحطة الكبيرة اوي دي للأسف مش هتلحق تفرح بلقب موسوعة غينيس لان فيه محطة تانية تحت الانشاء هتاخد منها اللقب

9-في "غرب الدلتا" بقى بيعملوا ايه بعد ما بيزرعوا اراضيهم ؟ بيرموها عادي جدًا في مصرف اسمه المكس والمصرف دا بياخد في وشه كل الصرف بتاع القرى دي ويقوم رميها في بحر إسكندرية ده واحد من اسباب مثلا ان لون بحر اسكندرية مش زي بحر الساحل ومطروح 

10-طب هنسكت ؟ ده كمية مياة مهولة حوالي ٢.٥ مليار م٣ سنويا حاليا بيتعمل محطة معالجة صرف زراعي ثلاثيًا في مدينة الحمام عشان تستقبل كل الصرف ده وتحوله لمياه صالحة للزراعة ونزرع بيها ٢.٢ مليون فدان جديد في مشروع اسمه "الدلتا الجديدة" طبعًا ال ٢.٥ مليار م٣ مش هيكفوا فهنعمل ترعة جديدة من النيل بخلاف هنسحب من المياه الجوفية ونزرع بيها المشروع العملاق الجديد

11-احلام ومعجزات والله كانت مستحيلة ان حد ممكن يفكر بل وينفذ بالسرعة والأداء الاحترافي ده شوف الصورة الجميلة دي مش ماكيت او تصميم دي من ارض الواقع 

12-وبالمناسبة "محطة بحر البقر" و "محطة الحمام" مش اخر المطاف احنا لسه هنعمل "محطة كوتشنر" و "محطة قارون" ومحطات تاني كتير ..