U3F1ZWV6ZTIxMzgzNDc4MzQ4X0FjdGl2YXRpb24yNDIyNDUzMDg1MTg=

ازاي أنقل من الكتب والمراجع - أبحاث طلاب الجامعات ، معلومات هتفيدك . اجابة على تساؤلات الطلاب

ازاي أنقل من الكتب والمراجع - أبحاث طلاب الجامعات ، معلومات هتفيدك . اجابة على تساؤلات الطلاب


السلام عليكم متابعي وزوار كوكب الجغرافيا الكرام ...، في المقال البسيط دا هنتعرف على كريقة النقل من الكتب والمراجع ، وطرق التوثيق لاعداد بحوث سنوات النقل لطلاب الجامعات ..

كتير من طلاب الجامعه وخاصة في المراحل الأول معندهمش دراية عن الأبحاث وطريقة كتابتها والاقتباس أو النقل من الكتب والمراجع ، ودا طبعا راجع لأن أغلب الكليات مفيهاش مقرر مناهج وطرق البحث الا في السنوات المتقدمة أو الدراسات العليا ..

وفي ظل الظروف الراهنة اخواتنا الطلاب في سنوات النقل بالجامعات المصرية ، بيدوروا على الطريقة الأنسب اللي من خلالها يقدر يعمل الأبحاث المطلوبة منه وبطريقة سليمة ووفق المعايير التي أعلنتها كل الكليات ..

أولا وقبل البدء في الخطوات ... لازم كل طالب يرجع لموقع الكلية المنتمي ليها ويقرأ الشروط التي اعلنتها الكلية لاعداد الأبحاث ، وفي المقال دا هنتعرض لأهم النقط اللي هتكون مشتركة بين كتير من الكليات ...

١. كتابة البحث هتحتاج من الطالب كتب ومراجع ، المرجع الأول اللي لا بد من الاعتماد عليه هو الكتاب الخاص بالمقرر وليكن على سبيل المثال طالب في كلية التجارة ومطلوب منه بحث في مقرر المحاسبة يبقى لازم يعتمد على كتاب المحاسبة اللي معاه والخاص بالمقرر.

٢. اغلب الكليات اشارت إلى ضرورة الاعتماد على أكثر من مرجع بعض الكليات اعلنت ٥ مراجع والبعض ٣ مراجع الخ... يبقى الطالب محتاج انه يدور على كتب تانية او ابحاث او رسائل علمية يقتبس منها ، طب ممكن الطالب يجيب كتب منين ؟؟ الكتب والأبحاث المتوفرة على موقع بنك المعرفة المصري ، والكتب الالكترونية بصيغة pdf من الانترنت ، على سبيل المثال ولتكن مادة المحاسبة .. الطالب هيبحث على الانترنت عن كتاب المحاسبة المتوسطة .pdf دا على سبيل المثال في محرك البحث جوجل هتظهر مجموعه من الكتب يقدر يستعين بيها .

٣. الطالب هينقل مباشرة من الكتب ولا الكتابة بأسلوب الطالب؟؟ في الغالب في المراحل الأولى من التدريس الجامعي الطالب بيكون صعب عليه يكتب بأسلوبه او يعيد صياغة العبارة بطريقته والطالب في الحالة دي بينقل مباشرة من الكتاب ،، يفضل طبعا ان الطالب يكتب باسلوبه او يعيد صياغة الفقرة اللي قرأها في كتاب أو كتابين ويرجع يكتبها بأسلوبه دا يكون أفضل من النقل المباشر من الكتاب .

٤. يعني ايه توثيق؟؟ التوثيق هو ان الطالب يكتب في البحث هو اخد الفقرة من اي كتاب ، يعني ببساطة تعريف المحاسبة مثلا الطالب نقله من كتاب دكتور اسمه محمد ، في اخر الفقرة الطالب هيفتح قوس ويكتب اسم المؤلف، السنه، الصفحه... هندي مثال توضيحي اكتر 

شهر رمضان هو شهر التقوى والايمان والتقرب إلى الله .(محمد محمد، ٢٠٢٠، ص ٥) 

دا يدل على ان الطالب نقل الفقرة دي من كتاب محمد محمد اللي منشور سنة ٢٠٢٠ م ، والجملة دي كانت في الكتاب في صفحة ٥ ، هنعمل كدا في كل فقرة من الفقرات اللي بننقلها . طبعا التوثيق ليه طرق كثيرة جدا ولكن صعب نتطرق ليها بكل تفاصيلها تو اختلافها .

٥. البحث لأغلب الكليات هيتكتب على word وكل كلية اعلنت الشروط الخاصة بالكتابة يعني حجم الخط هيبقى كام ، ونوع الخط وفي الغالب بيكون حجم خط الكتابة ١٤ على برنامج الوورد ونوع الخط في الغالب بيكون times new roman ولازم الطالب يراجع الشروط اللي اعلنتها الكلية كويس جدا وهو بيعد الأبحاث ويعمل التنسيقات النهائية قبل ارساله .

٦. عدد صفحات البحث... اختلفت من جامعه لجامعه ومن كلية لكلية ومن قسم لقسم ، بعض الكليات حددت من ٢٥٠٠ كلمه الى ٤٠٠٠ كلمة يعني البحث في النهاية لا يقل عن ٢٥٠٠ كلمة ولا يزيد عن ٤٠٠٠ كلمة ، وبعض الكليات حددت ٥ صفحات للبحث ، وبعض الكليات والأقسام حددت ١٥ او ٢٠ صفحة . علشان كدا لازم الطالب يرجع للشروط المعلنه على موقع الكلية .

٧. قائمة المراجع .. المقصود بيها كل الكتب اللي اعتمدت عليها في البحث هنكتبهم في صفحة في اخر البحث ونسميها من فوق قائمة المصادر والمراجع .. المراجع تتكتب ازاي ؟؟
هنكتب الكتب اللي اعتمدنا عليها في البحث ويفضل نرتبهم ابجديا حسب اسم المؤلف على سبيل المثال:
احمد علي ، المحاسبة المالية، دار المعرفة، القاهرة ، ٢٠٠٥م.
سامح احمد، المحاسبة المالية، دار ...، القاهرة، ٢٠٠٦م.
يحي علي، المخاسبة المالية، دار ...، ٢٠٠٥م.

بالشكل دا بدأنا ب أحمد لانه بحرف ال أ ثم سامح ثم يحي علشان يكون الترتيب أبجدي ، وكمان بنكتب نفس العناصر كدا المؤلف، عنوان الكتاب، دار النشر، مكان النشر، السنه.

الفيديو دا كمان ممكن يفيدك في اعداد البحث 



نتمنى تكون المقالة جاوبت على تساؤلات الطلاب 
لو شايف انها مفيدة شارك المقاله مع زمايلك وساعد غيرك 


كوكب الجغرافيا


الاسمبريد إلكترونيرسالة