الدليل الشامل للسويس : هتزور محافظة السويس لازم تقرأ المقال دا
 |
| دليلك لزيارة السويس |
في التقرير التالي هنقدملك تجربة فريدة من نوعها ، عبارة عن دليل مبسط جدا لزيارة السويس ، افضل الأماكن والمزارات ، تابع المقال للنهاية ...
بما ان الحظر تقريبا اتفك معظم الناس دلوقتي عايزة تخرج و عايزة تسافر تغير جو أنا من موقعي هذا برشح لكم السويس هتسألوني اشمعني السويس ببساطة لانها تعتبر اقرب محافظة للقاهرة ساعة و نص و تبقي في السويس ساعتين بالكتير جدا يعني تقريبا اقرب من اكتوبر.😂
السويس بلد صغيرة جدا تلفها كلها في الساعة طبعا السؤال هيكون طب اخرج فين او أروح فين ؟!🤔
اول مكان هو الكورنيش الجديد حلو جدا للناس الي بتحب البحر و خصوصا لو مفيش جزر و الكورنيش في الكافيهات و مطاعم كتير جدا و حقيقي مش هتزهق لو روحت كل يوم كافية.
وطبعا مش هنسي منتجع لوسيندا بردو في الكورنيش ده في اكوا بارك و كذا pool بس مش عارفة فتحوا دلوقتي و لا لسه و سعر دخول الفرد في حدود ١٠٠ او ١٥٠ جنية مش فاكرة بالظبط تقدروا تتاكدوا من المكان نفسه.
كنت هنسي حديقة الشهداء(حديقة مبارك سابقا) دي فيها العاب و بحيرة صناعية و صالة بولينج و قاعات افراح ممكن تتدخل تتفرج عليها و ليها بوابتين واحدة من الكورنيش و واحدة قدام المحافظة.
تاني مكان بورتوفيق دي بقي تحس كأنك دخلت اوروبا فيها ڤلل كان بعيش فيها المهندسين الاجانب زمان و كمان فيها استراحة السادات للاسف هي مش مفتوحة للناس تدخلها بس أمنيتي يعملوها متحف في بورتوفيق كذا نادي و كذا كافية تقدر تقعد فيه و تشوف المراكب و هي بتعدي و قدامك و تحس انك هتلمسها من كتر ما هي قريبة للاسف كورنيش بورتوفيق مقفول من ساعات الثورة و حقيقي ده من اكتر الاماكن الجميلة الي شوفتها و انت رايح بورتوفيق هتشوق متحف السويس في حوض الدرس بس بردو مش عارفة مفتوح حاليا و لا.
طب هتقولي ممكن اروح فين تاني ممكن تروح الملاحة الجديدة دي بردو فيها كافيهات كتير الحمدلله مفيش اكتر من الكافيهات عندنا. 😂
او تروح تشوف الكورنيش القديم و بيت المسجيري الي تصور فيه فيلم ابن حميده.
او تتمشي في النمسا و ممكن تروح الغريب تشوق مسجد سيدي الغريب الي تسمت بسببه السويس (بلد الغريب) و طبعا مش هنسي المولد بيجي ليه ناس من محافظات كتير او البر التاني و في شارع باراديس و شارع الشهداء و مبني المحافظة و قصر الثقافة.
لو جيت السويس يوم ٢٤ اكتوبر هتلاقينا بنحتفل بعيد السويس القومي و بيبقي في العاب نارية و كرنفال بسبب المقاومة الشعبية ضد اسرائيل لانهم حاول يحتلوا السويس بعد ٦ اكتوبر.
طبعا مش هنسي العين السخنة و المفاجأة بالنسبة لناس كتير انها تبع محافظة السويس😌 السخنة فيها كذا شاطئ عام اسعارهم من ٥٠ ل ١٥٠ و طبعا ممكن تحجز في القري داي يوز او تحجز يخت انت و صحابك و اسعارهم بتختلف حسب العدد 💕
بالنسبة للاكل بقي 😂❤️ فطبعا سويس يعني سي فود احسن مطاعم سي فود من وجهة نظري في السويس عروس البحر و فارس بس هما غالين شوية طبعا الحلقة مش هتقولنا لا😅فيها مطاعم تقدر تشوي او تقلي فيها سمك و بعدها تقعد تاكل في الكورنيش او في الجنينة قدام سينما رنيسانس ونصيحة حاول نختاروا سمك بعيد عن البوري و الشبار "البلطي" و اختاروا سمك بحر احلي من السمك المزارع.
حد هيقولي بس انا مش بحب اكل سي فود هقوله السويس فيها مطاعم فاست فود كتير افضلهم بالنسبة ليا اردور و مصراوي و سي سايد ليهم فروع في الكورنيش و البر التاني لو هتاكل في اردور الكورنيش متنساش تاخد وافل من جوسي للتحلية.
و ممكن تشرب حاجة من البرتقانة 😂 و تأكل بجد احلي ايس كريم من راتب او رز بلبن بالايس كريم.😍
طبعا هتقولي و كل الكلام ده محتاج ميزانية قد ايه ٢٥٠ ل ٥٠٠ حسب الاكل اللي هتختاره مثلا سي فود او لا و هتعقد في كافية او لا بردو حسب الكافية الي هتعقد فيه.
مواصلات السويس الكوربة ب 40 و السويس الرمسيس ٣٥ يعني في حدود ١٠٠ او ١٢٠ للمواصلات و المواصلات الداخلية ده طبعا من غير تاكسي.
و حقيقي انا بقالي كتير مش بركب تكاسي مش عارفة بالظبط بيبقوا في حدود كام بس عموما التاكسي في السويس غالي و في العموم السواقين مش بيشغلوا العداد انتوا قولوا ليهم.
و في الاخر السويس بلد حلوة و مش زحمة و مكان مريح نفسيا😌
كوكب الجغرافيا
نافذة الثقافة والمعرفة
0 تعليقات
شكرا لتعليقك .. سيتم الرد عليكم في اقرب وقت ممكن .
كوكب المنى